Verkiesingsdag – FEESDAG!

Op die 24 September 2011, was die landswye VVK verkiesingsdag om ons eie Volksraad te verkies!

Groot opgewondenheid  is landswyd ervaar, vir die meeste van ons was dit die eerste keer dat ons gaan stem, ander  van ons het al jare gelede weggebly van die sogenaamde demokratiese verkiesings. En hier het ons die geleentheid  gehad om aan ’n Volksverkiesing deel  te neem!

Donkerhoek Verkenners is getaak deur die verkiesingkommissie van die VVK om ook hier op Kleinfontein ’n stempunt  te organiseer en te beman. Tipies van ’n Verkenner is hierdie uitdaging met ywer en lus aangepak .

Daar is toe ’n komitee saamgestel wat die dag moes organiseer en beplan, die komitee het besluit om van die geleentheid gebruik te maak om ook Kleinfontein te bemark. ’n Program is saamgestel vir die dag  en daar is toe volstoom aan die werk gespring!

Die eerste uitdaging was hoe gaan ons die gemeenskap van Kleinfontein betrek by hierdie poging? Daar is toe besluit dat ons ’n kermis atmosfeer op stemdag wil skep (onthou ons ouer mense  nog hoe lekker was stemdae in die verlede?) Instansies asook komitees hier op Kleinfontein is betrek , vir kos verkope asook stalletjies, beplanningsvergaderings is gehou, die dag is behoorlik deurtrap, daar is toe besluit dat elke kos stalletjie voorsiening moet maak vir 300 etes!  Die vraag is gevra of ons nie te optimisties  is nie!  Ons as inwoners op Kleinfontein het toe vir mekaar gesê ons aanvaar die uitdaging!  Die mikpunt was dat ons met behoorlike bemarking een duisend siele die dag hier kan hê.

Die volgende uitdaging was “hoe gaan ons die dag bemark”?  Die Republikeinse Vroue Beweging (RVB) het ingespring en baniere  met die hand geverf wat opgesit is by die Poorte, plakkate is bekom by VVK en opgesit, strooibiljette is gedruk en versprei van huis tot huis op Kleinfontein.

Daar het ‘n gevoel ontstaan dat bemarking  op ’n groter skaal aangepak moet word.  Hieruit is Kleinfontein Sakekamer gestig! (eerste op Kleinfontein) Onder leiding van Hendrik  Verwoerd (voorsitter) is daar pryse beding by Radio Pretoria, promosie gesprekke gevoer op die radio van besighede hier op Kleinfontein. Terug oor promosie gesprekke was deurgaans baie positief.

Daar is gevra of dit nie die ideale geleentheid  sal wees vir die oprigting en onthulling van die Verwoerd -borsbeeld  wat toe alreeds ’n geruime tyd onder ’n lap in die Gemeenskapsaal “gestoor” is nie. Die gedagte is ook positief deur die Gemeenskap ontvang en dadelik moes daar werk van gemaak  word omdat daar slegs twee weke beskikbaar was om alles te reël.  ’n Verwoerd borsbeeld komitee is aangewys en daar is aan die werk gespring en mense wat gereken het dat die twee weke  te min was se monde is gesnoer! 

Op die 24 September 2011 om 09:00 die oggend is die beeld onthul, op gepaste wyse, ook ’n eerste hier op Kleinfontein – hier was selfs ’n verbyvlug van vier vaste vlerk vliegtuie tydens die onthulling!

Terwyl al hierdie bedrywighede plaasgevind het op Kleinfontein , moes die hoofdoel van die dag ’n sukses wees naamlik dat ons nie moes vergeet om ook te gaan stem nie! Registrasie beamptes asook ander inwoners is nader getrek om die stem punt te organiseer en beman.

Vergaderings is gehou, die stem punt is beplan en alles was behoorlik in plek op stemdag,  Landswyd is hier op Kleinfontein die meeste   stemme uitgebring!

Langs hierdie weg baie dankie aan almal wat deel was van die GROOT sukses van die dag.

Ek is trots daarop om  deel van hierdie Volk te wees!

Soos die Verkenner slagspreuk sê ONS KAN , ONS WIL ,  ONS SAL!

Baba Botha

Kersfees 2010 was ‘n baie hartseer tyd vir twee meelewende Kleinfonteiners, Verkenner Johan Botha en sy vrou Risella. Hulle het met groot blydskap uitgesien na die geboorte van hul seuntjie. Sy bedjie was reg op sy plek, kleertjies mooi uitgepak in die laaikas. Kombersies,  spoeg doeke, alles was reg vir sy koms. Min het hulle geweet dat hulle daardie goedjies weer moes wegpak, want die Here het vir Ruan kom haal, ‘n skrale week na sy geboorte. Hy is met ‘n keisersnit in die wêreld gebring, Mamma en Pappa was vreeslik opgewonde. ‘n Uur later is hy in die intensiewe eenheid opgeneem, waar hy geveg het vir sy lewe.

Die dokters het hom gediagnoseer met ‘n baie komplekse hartdefek. Behalwe vir dit,  was sy hart aan die regterkant, het sy lewer nie normaal gefunksioneer nie en was sy dermpie nie verbind aan sy anussie nie. Sy nefie, Janneman, het dieselfde hartdefek gehad, maar die Here het hom 3 jaar gespaar. Nou is die 2 nefies by hul Vader in die hemel, waar hulle nooit weer pyn sal verduur nie.

Kersfees 2011 lê om die draai, en raai wat? Risella is weer swanger! Natuurlik is almal vreeslik opgewonde saam met hulle en bid dat die Here se genade oorvloedig oor hulle sal wees.   Die Here gee vir hulle weer ‘n seuntjie.... met dieselfde hartdefek... Almal is plat geslaan, vra vrae, worstel... Maar soos God in Sy Woord troos, gee Hy die krag altyd saam met die beproewing. Die Botha’s het hulle koppe opgetel en die Here gevra vir leiding. Hulle het by Sunninghill (waar ‘n kinder harteenheid is) aangeklop vir hulp. Toe kom die verdoemende uitslag: die kans is BAIE skraal dat die baba sal oorleef, termineer die baba!

Weer is hulle platgeslaan: vra vrae, worstel... Hulle word verwys na die Kaap, en gelukkig is hulle meer positief- Dr Susan Vosloo (wat onder  dr. Chris Barnard gestudeer het) sien kans om te veg vir hierdie kosbare lewetjie! As alles goed gaan, word hy middel Februarie gebore. So daar kan voorbereidings getref word vir sy koms.  Die plan sovêr is om met 3 groot operasies die hartjie reg te kry, waarvan die eerste die gevaarlikste is. Maar hulle toekoms is so onseker. Net die Here alleen kan hulle lei soos dit in Sy raadsplan is. Bid asseblief vir hulle!

Die Bybel leer ons egter om te bid en te werk. Daarom het die Donkerhoek RVB (Republikeinse Vrouebeweging) dit goedgedink om ‘n Kersmark te hou op 3Desember 2011 vanaf 9h00 by die Uit en Tuis Winkel Sentrum op Kleinfontein ten bate van Baba Botha.

Indien u eerder ‘n donasie wil maak is u ook welkom.

Die bankbesonderhede is as volg:

Bank: ABSA

Naam: KSKK Beperk

Tak: 632005

Rek.nr: 4060092627

Verw: 177G (en u naam)

Kom ons maak ons harte oop vir hierdie egpaar wat deur so ‘n moeilike tyd gaan. En al beplan die Here dit anders, moet ons steeds vir mekaar kan sê: Soli deo Gloria! (aan God alleen die eer)

Noue-ontkomings!

Eendag sal die Verkenners ‘n boek kan skryf oor al  die wedervaringe tydens misdaad voorkoming aksies!  In twee gevalle die afgelope paar maande was die V-Span in noue-ontkomings!

Die eerste geval was die gemeenskap per radio ingelig dat daar ‘n plaasaanval besig is om te gebeur.  Die V-Span het toe langs ‘n ontvlugting roete stelling ingeneem om die kriminele te kan vang.  Na 20 minute se wag kom die gewapende kriminele doodrustig aangestap.

Toe die kriminele die V-span opmerk, is daar dadelik op die V-span gevuur.  Altesaam 28 skote is geskiet tussen die V-Span en die kriminele.  Ons is dankbaar om te se dat geen een van die Verkenners getref is nie.  Die Here se Genade was groot oor ons!

Dan het Kleinfontein vroeër die jaar gebuk gegaan onder 17 inbrake net in KBK.  Die bende kriminele het sommer 2 of 3 maal per week toegeslaan en het die hele gemeenskap op hol gehad. 

Na suksesvolle inligtinginsameling van die V-Span is daar min of meer bepaal wat die kriminele se ontsnappingsroete is.

Na ‘n volgende inbraak het die V-span hulself gaan posisioneer juis by die ontsnappingsroete.  Doodluiters het die kriminele tussen die eerste Verkenners ingestap gekom.  Toe hulle die V-span lede gewaar, slaan hulle soos vlakhase op vlug.  Een van die V-span lede was verder af in hul roete en het reggemaak om die een ‘n duikslag te gee.

Met die wat die V-span lid en die krimineel op mekaar afhardloop, sien die V-span lid dat die swart man met ‘n breekyster op hom afstorm.  Hy het net betyds uit die pad gekom om die hou te mis.  Die misdadiger het hard met die grond kennis gemaak, maar het ongelukkig wel geslaag daarin om weg te kom.

Die inbrake op Kleinfontein het dadelik opgehou en daar was nie weer ‘n geval nie!

Dit beklemtoon net weer die belangrikheid van voldoende opleiding en die feit dat die gemeenskap nie bang moet wees vir misdadigers nie, maar dat die misdadigers moet bang wees vir die gemeenskap.  Gemeenskap betrokkenheid is een van die belangrikste aspekte in misdaadvoorkoming!

Skakel gerus met die Verkenners as u meer betrokke wil raak in misdaadvoorkoming.  Daar is altyd ‘n tekort aan hulpmiddels, geld en logistieke bystand.  Raak betrokke en bekamp misdaad so in jou omgewing!

Die POS

Werksaamhede op die Verkenners se plaas die POS (Tandem Plaas) vorder fluks!  Daar is ‘n nuwe afdak opgesit en verdere verbeterings aangebring.  Met nuwe toiletgeriewe, water aansluiting, krag aansluiting en lekker braai geriewe raak die POS al hoe meer gewild onder ons volksgenote.

Volksgenote kan die POS huur vir enige funksies.  Kostes om die POS en sy geriewe te gebruik is R200 per dag.  Skakel gerus met die Verkenners vir meer inligting.

Wessel Burger!

Maande se gestoei in die howe van die Regime het uiteindelik vrugte afgewerp toe ‘n uitsettingsbevel toegestaan is teen Wessel Burger op 7 September 2011. Die landdroshof vir die distrik Cullinan het gelas dat die perseel voor of op 23 September 2011 om 16h00 ontruim moet word. Die hof het ook ‘n kostebevel teen Mnr Burger ingestel en gevolglik is hy ook verantwoordelik vir KBK se regskostes.

  Eie aan Mnr Burger se gewoonte om enige vorm van gesag te verwerp, het hy ook hierdie hofbevel geïgnoreer en het hy nie op die genoemde datum die perseel ontruim nie. Gevolglik is die hulp van die balju in geroep en op ‘n helder sonskyn dag is Mnr Burger se besittings van die perseel verwyder en langs die groot pad afgelaai. Vir dae het Wessel se gemors langs die pad naby die hoewes gelê wat baie onooglik was.  Die Verkenners het hom geskakel en gevra hy moet die gemors verwyder.  Na nog ‘n dag of twee het die Verkenners gegaan en die gemors gaan optel en by die asgate afgooi.  Tussen al die gemors het die Verkenners ook die lot sleutels gekry...

Mnr Burger was klaarblyklik hewig ontsteld oor hierdie toedrag van sake en het wraak gesweer teen lede van die Verkenners wie hy nou persoonlik verantwoordelik hou vir die feit dat hy verwyder is van Kleinfontein. Dit blyk dat Mnr Burger verskeie persone gemotiveer het om valse klagtes by die SAP in te dien teen die lede, maar na die howe die belaglikheid van die klagtes ingesien het en die sake uit die hof gegooi het, het Mnr Burger hom beroep op die hulp van die lae-klas skinder-koerant Sondag, waar sy smeerveldtog voort gesit is.

Dit is gewoon so dat vir elke aksie daar ‘n reaksie is en gevolglik sal die Donkerhoek Verkenners regsadvies inwin indien Mnr Burger nie met sy laster staak nie. Daar is reeds ‘n saak van onregmatige arrestasie gemaak teen die SAP na een van die belaglike klagtes wat Mnr Burger gereël het by die SAP, die moontlikheid word ondersoek of Mnr Burger saam met die SAP finansieel verantwoordelik gehou kan word vir hierdie onregmatige arrestasie.

In tussen is Mnr Burger nie meer op die Hoewes nie en is die rustigheid en vrede herstel vir die inwoners van die Hoewes.